Notkunarleiðbeiningar
Cosentyx® 75 mg áfyllt sprauta
Notkunarleiðbeiningar fyrir
Cosentyx 75 mg áfyllta sprautu
Lestu ALLAR þessar leiðbeiningar áður en þú gefur inndælingu.
Mikilvægt er að þú eða umönnunaraðili reyni ekki að gefa þér lyfið sjálf/sjálfur fyrr en þjálfun hefur fengist hjá lækninum, hjúkrunarfræðingnum eða lyfjafræðingi.
Askjan inniheldur eina Cosentyx 75 mg áfyllta sprautu sem er innsigluð í plastþynnu.
Leiðbeiningar fyrir Cosentyx 75 mg áfyllta sprautu
Mikilvægt er að Cosentyx (secukinumab) 75 mg áfyllta sprautan sé auðveld í notkun fyrir sjúklinginn, heilbrigðisstarfsmann eða umönnunaraðila. Horfðu á myndbandið um hvernig sjúklingar geta sprautað sig sjálfir og taktu eftir því hvað það er sem þú þarft að hafa í huga áður en inndælingin er gefin.
Áður en þú notar Cosentyx 75 mg áfylltu sprautuna í fyrsta sinn á heilbrigðisstarfsmaður með viðeigandi þjálfun að sýna þér hvernig á að sprauta sig með Cosentyx (secukinumabi) á réttan hátt. Láttu heilbrigðisstarfsmanninn vita ef þér finnst þú ekki hafa fengið nægar upplýsingar og/eða þjálfun eða ef þig vantar enn svör við einhverju.
Cosentyx 75 mg áfyllta sprautan:
Eftir að lyfið hefur verið gefið virkjast sprautuhlífin þannig að hún hylur nálina. Þetta er ætlað til að hjálpa til við að verja heilbrigðisstarfsmenn, sjúklinga sem gefa sér sjálfir lyf sem ávísað hefur verið af lækni og einstaklinga sem aðstoða sjúklinga sem gefa sér lyfið sjálfir, fyrir áverkum af völdum nálarstunga fyrir slysni.
Hvað þú þarft til viðbótar fyrir inndælinguna:
- Sprittþurrka.
- Bómullarhnoðri eða grisja.
- Ílát fyrir beitta hluti.
Mikilvægar öryggisupplýsingar:
Varúð: Geymið sprautuna þar sem börn hvorki ná til né sjá.
- Nálarhettan á sprautunni getur innihaldið þurrt gúmmí (latex), sem einstaklingar sem eru næmir fyrir efninu eiga ekki að meðhöndla.
- Ekki opna innsigluðu ytri öskjuna fyrr en þú ert tilbúin/tilbúinn að nota lyfið.
- Ekki nota lyfið ef annaðhvort innsiglið á ytri öskjunni eða innsiglið á þynnunni er rofið því þá getur verið að ekki sé öruggt að nota það.
- Aldrei skilja sprautuna eftir á glámbekk þar sem aðrir gætu átt við hana.
- Ekki hrista sprautuna.
- Gættu þess að snerta ekki vængina á sprautuhlífinni fyrir notkun. Með því að snerta þá getur verið að sprautuhlífin virkist of snemma.
- Ekki fjarlægja nálarhettuna fyrr en rétt áður en þú gefur inndælinguna.
- Ekki er hægt að nota sprautuna aftur. Farga skal notuðum sprautum strax eftir notkun í ílát fyrir beitta hluti.
Geymsla Cosentyx 75 mg áfylltrar sprautu:
- Geymið lyfið í lokaðri ytri öskjunni til varnar gegn ljósi. Geymið í kæli við 2°C til 8°C. MÁ EKKI FRJÓSA.
- Mundu að taka sprautuna úr kælinum til að hún nái stofuhita áður en hún er undirbúin fyrir inndælinguna (15-30 mínútur).
- Ekki skal nota sprautuna eftir fyrningardagsetningu sem tilgreind er á ytri öskjunni eða merkimiðanum á sprautunni á eftir „EXP“. Ef lyfið er útrunnið skal skila allri pakkningunni í apótekið.
Stungustaðurinn:
Stungustaðurinn er sá staður á líkamanum þar sem þú ætlar að sprauta þig.
- Ráðlagður staður er framan á lærum. Þú getur einnig notað neðri hluta kviðar, en ekki svæðið sem er 5 sentimetra í kring um naflann.
- Veldu mismunandi stað í hvert skipti sem þú gefur þér inndælingu.
- Ekki gefa lyfið í svæði þar sem húðin er aum, marin, rauð, flögnuð eða hörð. Forðist að sprauta í ör eða húðslit.
Ef umönnunaraðili gefur þér inndælinguna má einnig nota svæðið utanvert á upphandleggjum.
Undirbúningur fyrir notkun Cosentyx 75 mg áfylltu sprautunnar:
- Taktu öskjuna með sprautunni út úr kælinum og láttu hana standa óopnaða í um það bil 15-30 mínútur til að hún nái stofuhita.
- Þegar þú ert tilbúin/tilbúinn að nota sprautuna skaltu þvo þér vandlega um hendurnar með sápu og vatni.
- Hreinsaðu stungustaðinn með sprittþurrku.
- Taktu sprautuna úr öskjunni og úr þynnunni með því að halda um sprautuhlífina.
- Skoðaðu sprautuna. Vökvinn á að vera tær. Liturinn getur verið frá því að vera enginn í að vera lítillega gulleitur. Þú getur séð litlar loftbólur, sem er eðlilegt. EKKI NOTA lyfið ef vökvinn inniheldur auðsjáanlegar agnir, er skýjaður eða greinilega brúnn. EKKI NOTA lyfið ef sprautan er brotin. Í öllum þessum tilvikum skal skila allri pakkningunni í apótekið.
Hvernig nota á áfyllta Cosentyx 75 mg sprautu:
Fjarlægðu nálarhettuna varlega af sprautunni með því að halda um sprautuhlífina. Fargaðu nálarhettunni. Það getur verið dropi af vökva á endanum á nálinni. Það er eðlilegt.
Klíptu varlega saman húðina á stungustaðnum og stingdu nálinni inn eins og sýnt er. Þrýstu nálinni alla leið inn með um það bil 45 gráðu halla til að tryggja að hægt sé að gefa lyfið að fullu.
Haltu sprautunni eins og sýnt er. Þrýstu stimplinum hægt niður eins langt og hann kemst þannig að stimpilendinn sé allur á milli vængjanna á sprautuhlífinni.
Haltu stimplinum alveg niðri á meðan þú heldur sprautunni á staðnum í 5 sekúndur.
Haltu stimplinum alveg niðri meðan þú dregur nálina varlega beint út úr stungustaðnum.
Losaðu hægt um stimpilinn þannig að sprautuhlífin hylji nálina sjálfkrafa.
Það getur verið smá blóð á stungustaðnum. Þú getur þrýst bómullarhnoðra eða grisju yfir stungustaðinn og haldið í 10 sekúndur. Ekki nudda stungustaðinn. Þú getur sett lítinn plástur yfir stungustaðinn ef þörf krefur.
Leiðbeiningar varðandi förgun:
Farga skal notuðu sprautunni í ílát fyrir beitta hluti (lokanlegt, stunguþolið ílát). Vegna öryggis og heilsu þinnar og annarra má aldrei nota aftur nálar og notaðar sprautur.
